ٹویوٹاگاڑیوں کی قیمت میں ایک بارپھراضافہ

ویب ڈیسک ۔۔ پاکستان میں ٹویوٹاگاڑی کےشوقین حضرات کیلئےزورکاجھٹکا۔ جی ہاں ، ٹویوٹا نے پاکستانی صارفین کے لیے گاڑیوں کی قیمت میں 12 لاکھ روپے تک کا اضافہ کردیا ہے۔

نجی خبر رساں ادارے کی رپورٹ کے مطابق انڈس موٹرز نے ٹویوٹا گاڑیوں کے شوقین افراد کو بڑا دھچکا دیا ہے اوراپنی گاڑیوں کی قیمت میں 12 لاکھ 57 ہزار روپے تک کا اضافہ کردیا ہے۔

رپورٹ کے مطابق اضافے کی وجہ پاکستانی روپے کی قدر میں اچانک کمی اوراجناس و مال برداری کی قیمتوں میں بڑے پیمانے پر اضافے کو ٹہرایا گیا ہے۔

رپورٹ کے مطابق پاکستان میں گاڑیوں کو اسمبل کرنے والی کمپنیوں کی جانب سے بھی جلد قیمتوں میں اضافہ متوقع ہے جبکہ اس حوالے سے انڈس موٹرز نے اپنے ڈیلرز کو ایک سرکلر بھی جاری کیا ہے۔

سرکلر کے مطابق کمپنی کا کہنا ہے کہ موجودہ صورت حال کے پیش نظر کمپنی نے خوردو قیمتوں میں اضافہ کیا ہے کیونکہ کمپنی کے لیے اسے برقرار رکھنا انتہائی مشکل ہے جس کی وجہ سے وہ مارکیٹ کچھ اثرات ڈالنے پرمجبور ہیں۔

کمپنی کا کہنا تھا کہ سسٹم میں موجود 22 مارچ تک کے تمام بقایا آرڈرز جون تک ڈیلیور کردیے جائیں گے۔

کمپنی کے مطابق بک کرائی گئی گاڑیوں کی ادائیگی کے لیے آخری تاریخ 10 اپریل 2022 مقرر کی گئی ہے۔ اس تاریخ یا اس سے پہلے ادائیگی پر پرانی قیمت پر ہی گاڑی دستیاب ہوگی جبکہ رقوم کی منتقلی کوریئر سروس کے ذریعے ہوگی۔

ناقص نیشنل سیلزٹیکس ریٹرن پورٹل ۔۔ بڑےاسٹورزکیلئےدردسر

کمپنی نے کس گاڑی میں کتنا اضافہ کیا؟
ٹویوٹا فورچیونر
سب سے زیادہ اضافہ فورچیونر لیجنڈر کی گاڑی میں کیا گیا ہے جس کی قیمت 12 لاکھ 57 ہزار روپے اضافے کے بعد 1 کروڑ 20 لاکھ 99 ہزار ہوگئی ہے جبکہ پرانی قیمت 1 کروڑ 8 لاکھ 42 ہزار روپے تھی۔

اسی طرح فورچیونر ایل او پیٹرول کی قیمت میں 9 لاکھ 30 ہزار روپے تک کا اضافہ کیا گیا ہے جس کے بعد اس کی قیمت 94 لاکھ 99 ہزار روپے ہوگئی ہے۔

فورچیونر ہائی پیٹرول گاڑی 10 لاکھ 8 ہزار روپے اضافے کے بعد 1 کروڑ 9 لاکھ 49 ہزار روپے ہوگئی ہے جبکہ فورچیونر ڈیزل کی قیمت 10 لاکھ 97 ہزارروپے اضافے کے بعد 1 کروڑ 14 لاکھ 89 ہزار روپے ہوگئی ہے۔

ٹویوٹا کورولا
ٹویوٹا کورولا ماڈلز کی گاڑیوں کی قیمتوں میں 3 لاکھ 69 ہزار روپے سے 4 لاکھ 9 ہزارروپے تک کا اضافہ کیا گیا ہے۔

ٹویوٹا کورولا ماڈلز 1.6 اے ٹی کی قیمت 37 لاکھ 49 ہزار روپے، 1.6 اے ٹی یو ایس پی ای سی کی قیمت 39 لاکھ 29 ہزار روپے ہوگئی ہے۔

ٹویوٹا کورولا 1.8 سی وی ڈی کی قیمت 43 لاکھ 9 ہزار اور 1.8 سی وی ٹی ایس آرکی قیمت 46 لاکھ 49 ہزار کالے رنگ کی 1.8 سی وی ٹی ایس آرکی قیمت 46 لاکھ 89 ہزار ہوگئی ہے۔

ٹویوٹا یارس
ٹویاٹا یارس گاڑیوں کی قیمت میں 2 لاکھ 87 ہزار روپے سے 3 لاکھ 24 ہزار روپے تک کا اضافہ کیا گیا ہے۔

ٹایوٹا یارس کے ماڈلز 1.3 ایم ٹی، 1.3 سی وی ٹی، 1.3 ایچ ایم ٹی اور 1.3 ایچ سی وی ٹی کی قیمتیں بالترتیب 28 لاکھ 99 ہزار، 31 لاکھ 9 ہزار، 30 لاکھ 59 ہزار اور 32 لاکھ 29 ہزار تک ہوگئی ہیں۔

ٹویوٹا یارس کے ماڈلز 1.5 ایم ٹی اور 1.5 سی وی ٹی کی قیمتیں بالترتیب 32 لاکھ 89 ہزار اور 34 لاکھ 99 ہزار ہوگئی ہے۔

ٹویوٹا ریوو
ٹویوٹا ریوو کی گاڑیوں میں 8 لاکھ 47 ہزار روپے تک کا اضافہ کیا گیا ہے اور ریوو جی ایم ٹی، جی اے ٹی، وی اے ٹی اور وی اے ٹی روکو کی قیمتیں بالترتیب 76 لاکھ 59 ہزار، 80 لاکھ 29 ہزار، 88 لاکھ 39 ہزار اور 93 لاکھ 19 ہزار روپے ہوگئی ہے۔

پیوگو2008:پاکستان میں فرنچ گاڑی کی لانچنگ