سٹاک مارکیٹ میں سرمایہ کاری اب بہت آسان

Saturday, 29 August 2026 | Web Desk

اسلام آباد:پاکستان کی اسٹاک مارکیٹ میں سرمایہ کاری کا عمل آسان اور تیز بنانے کے لیے سیکیورٹیز اینڈ ایکسچینج کمیشن آف پاکستان (ایس ای سی پی) نے نیا ڈیجیٹل آن بورڈنگ فریم ورک متعارف کرا دیا ہے۔

سادہ الفاظ میں اس نئے نظام کا مقصد یہ ہے کہ جو شخص اسٹاک مارکیٹ میں سرمایہ کاری کرنا چاہتا ہے، اسے اکاؤنٹ کھلوانے کے لیے طویل اور پیچیدہ کاغذی کارروائی سے کم سے کم گزرنا پڑے۔ اب اکاؤنٹ کھولنے، درخواست کی جانچ اور اس کی پیش رفت دیکھنے کا عمل زیادہ تر ڈیجیٹل طریقے سے اور24گھنٹے کیا جا سکے گا۔

سہولت اکاؤنٹ ایک دن میں کھلے گا

ایس ای سی پی کے مطابق نئے فریم ورک کے تحت اسٹاک مارکیٹ میں سہولت اکاؤنٹ ایک دن میں کھولا جا سکے گا، جبکہ انویسٹر اکاؤنٹ کھولنے کی درخواست پر زیادہ سے زیادہ دو دن میں فیصلہ کیا جائے گا۔

اس کا مطلب ہے کہ نئے سرمایہ کاروں کو اکاؤنٹ کھولنے کے لیے غیرضروری انتظارنہیں کرنا پڑے گا اور وہ نسبتاً جلد اسٹاک مارکیٹ میں سرمایہ کاری شروع کر سکیں گے۔

درخواست کا اسٹیٹس بھی آن لائن دیکھا جا سکے گا

نئے نظام میں سرمایہ کاروں کو اپنی درخواست کے بارے میں بھی باخبر رکھا جائے گا۔ سرمایہ کار کو ایک ٹریکنگ آئی ڈی فراہم کی جائے گی، جس کے ذریعے وہ اپنی درخواست کا اسٹیٹس آن لائن چیک کر سکیں گے۔

اگر بروکر کسی شخص کی اکاؤنٹ کھولنے کی درخواست مسترد کرتا ہے تو اسےمسترد کرنے کی وجوہات تحریری طور پر بتانا ہوں گی۔ اس اقدام سے سرمایہ کار کو یہ سمجھنے میں مدد ملے گی کہ اس کی درخواست کیوں منظور نہیں ہوئی۔

پہلے سے تصدیق شدہ سرمایہ کار کو دوبارہ تصدیق نہیں کرانا پڑے گی

فریم ورک کی ایک اہم سہولت یہ بھی ہے کہ جو سرمایہ کار پہلے ہی مطلوبہ طریقے سے تصدیق شدہ ہو، اسے ہر بار دوبارہ تصدیق کے مرحلے سے نہیں گزرنا پڑے گا۔

ایس ای سی پی کے مطابق نئے نظام کے تحت 24 گھنٹے، ہفتے کے ساتوں دن ڈیجیٹل آن بورڈنگ اور درخواستوں کی پراسیسنگ ممکن ہوگی۔

مقصد زیادہ لوگوں کو اسٹاک مارکیٹ سے جوڑنا ہے

ایس ای سی پی کے مطابق اس اقدام کا ایک اہم مقصد پاکستان میں سرمایہ کاروں کی تعداد میں نمایاں اضافہ کرنا ہے۔ کمیشن نے سرمایہ کاروں کی تعداد 25 لاکھ تک بڑھانے کا ہدف مقرر کیا ہے۔

خاص طور پر نوجوانوں کو اسٹاک مارکیٹ کی طرف لانے پر توجہ دی جا رہی ہے تاکہ نئی نسل بھی ملک کی کیپیٹل مارکیٹ میں سرمایہ کاری کے مواقع سے فائدہ اٹھا سکے۔

ایس ای سی پی کے چیئرمین ڈاکٹر کبیر احمد سدھو نے کہا کہ نوجوانوں کی اسٹاک مارکیٹ میں شمولیت بڑھانا ترجیح ہے۔ ان کے مطابق ٹیکنالوجی کے استعمال سے اسٹاک مارکیٹ میں سرمایہ کاری کے عمل کو آسان بنایا جا رہا ہے۔

انہوں نے کہا کہ پاکستان کی کیپیٹل مارکیٹ میں ترقی اور سرمایہ کاری کے وسیع امکانات موجود ہیں۔

آخر یہ خبر عام آدمی کے لیے کیوں اہم ہے؟

اس خبر کا بنیادی مطلب یہ ہے کہ اسٹاک مارکیٹ میں سرمایہ کاری شروع کرنے کے لیے اکاؤنٹ کھلوانے کا عمل پہلے کے مقابلے میں زیادہ تیز، ڈیجیٹل اور شفاف بنانے کی کوشش کی جا رہی ہے۔

یعنی نئے نظام میں سرمایہ کار کو اکاؤنٹ کھولنے کے لیے کم انتظار کرنا ہوگا، اپنی درخواست کی پیش رفت خود دیکھ سکے گا اور اگر درخواست مسترد ہوئی تو اسے وجہ بھی بتانا ضروری ہوگا۔ اس طرح ایس ای سی پی کا مقصد اسٹاک مارکیٹ تک عام شہری، بالخصوص نوجوانوں، کی رسائی آسان بنانا اور زیادہ لوگوں کو سرمایہ کاری کے نظام میں شامل کرنا ہے۔