فوادکی نئی بالی وڈفلم کاٹیزرجاری

ویب ڈیسک: پاکستانی سپر اسٹار فواد خان بالی ووڈ میں اپنی شاندار واپسی کے لیے تیار ہیں، جہاں وہ وانی کپور کے ساتھ فلم ابیر گلال میں نظر آئیں گے۔ فلم کا ٹیزر ایک گانے کی شکل میں جاری کیا گیا ہے، جس میں فواد خان کو وانی کپور کے لیے گاتے ہوئے دیکھا جا سکتا ہے۔ دلکش مناظر میں دونوں اداکار بےحد خوبصورت لگ رہے ہیں، جس سے فلم کے لیے شائقین کی بے چینی مزید بڑھ گئی ہے۔

فواد خان اور وانی کپور دونوں نے اس گانے کے ٹیزر کو سوشل میڈیا پر شیئر کیا ہے، جس کے بعد مداحوں میں بے حد جوش و خروش پایا جا رہا ہے۔

ابیر گلال 9 مئی 2025 کو سینما گھروں کی زینت بنے گی۔ وانی کپور نے اس اعلان کو شیئر کرتے ہوئے لکھا، "انتظار ختم! فواد خان کے ساتھ ابیر گلال کے ذریعے محبت کو بڑی اسکرین پر واپس لا رہے ہیں۔ 9 مئی کو سینما میں ملتے ہیں!”

بھارت اور پاکستان میں فواد خان کے مداح ان کی رومانوی فلم کے ساتھ بالی ووڈ میں واپسی پر بےحد خوش ہیں۔ مداحوں نے فلم کے ٹیزر کو خوب سراہا، جہاں ایک فین نے تبصرہ کیا، "بالی ووڈ کی شان واپس آ گئی!” شائقین خاص طور پر فواد خان کی کرشماتی اسکرین موجودگی اور ان کے دلکش رومانوی انداز کو دیکھنے کے لیے بےتاب ہیں، جنہیں وہ کافی عرصے سے بڑی اسکرین پر یاد کر رہے تھے۔