جیونیوزکی غیرمشروط معافی اوروضاحت

Saturday, 4 July 2026 | Web Desk

پاکستان کےمعروف اردونیوزچینل جیونے10محرم کونشرہونےوالی ڈاکومینٹری سفرعشق کےحوالےسےاپنی ویب سائٹ پرتفصیلی وضاحت اورمعذرت جاری کی ہے۔ تحریری وضاحت اورمعذرت کےساتھ ساتھ ویڈیوپیغام بھی جاری کیاگیاہے۔

جیونیوزکی وضاحت اورمعذرت

اس وضاحت کا مقصد کسی غلطی کا دفاع کرنا نہیں بلکہ اس کا دیانت داری سے اعتراف کرنا، اٹھائے گئے فوری اقدامات سے آگاہ کرنا اور اس عزم کا اعادہ کرنا ہے کہ آئندہ ایسی صورتحال دوبارہ پیدا نہ ہو۔

1۔ ہم اس غلطی کا مکمل اعتراف کرتے ہیں۔
جو کچھ ہوا وہ غلط تھا۔ ہم نہ اس کا دفاع کرتے ہیں، نہ اس کی سنگینی کو کم کرنے کی کوشش کرتے ہیں اور نہ ہی اس کے لیے کوئی جواز پیش کرتے ہیں۔ اس پر ہمیں دلی افسوس ہے۔

2۔ یہ واقعہ مکمل طور پر غیر ارادی تھا۔
یہ ایک سنگین اداراتی (Editorial) غلطی تھی۔ یہ نہ جان بوجھ کر کی گئی اور نہ ہی جیو نیوز کی ادارتی پالیسی یا نظریاتی مؤقف کی عکاس تھی۔ اس واقعے نے ہمیں ذاتی طور پر بھی مذہبی اور جذباتی طور پر شدید رنج پہنچایا کیونکہ یہ معاملہ ان اقدار اور عقائد سے متعلق ہے جن کا ہم خود بھی دل سے احترام کرتے ہیں۔

3۔ ہم نے خود غلطی کی نشاندہی کی اور فوری اصلاح کی۔
ہم نے خود اس غلطی کا ادراک ہوتے ہی متعلقہ مواد فوری طور پر ہٹا دیا، اس سے پہلے کہ کوئی ادارہ یا فرد ہم سے رجوع کرتا۔ یہ اقدام بیرونی دباؤ کے نتیجے میں نہیں بلکہ ہمارے اپنے احساسِ ذمہ داری کا مظہر تھا۔

4۔ فوری احتساب کیا گیا۔
متعلقہ رپورٹر اور ادارتی کمیٹی کے ذمہ دار افراد کو شوکاز نوٹس جاری کیے گئے، باقاعدہ انکوائری شروع کی گئی، اور ادارے کی پالیسی کے مطابق سخت تادیبی کارروائی عمل میں لائی جا رہی ہے۔

5۔ آئندہ کے لیے مزید مضبوط حفاظتی اقدامات کیے گئے ہیں۔
ادارتی منظوری کے نظام کو مزید مؤثر بنایا گیا ہے، اضافی جانچ کے مراحل شامل کیے گئے ہیں، نگرانی کا نظام مضبوط کیا گیا ہے اور ایسے حفاظتی انتظامات کیے گئے ہیں تاکہ مستقبل میں ایسی کسی غلطی کے امکانات کو کم سے کم کیا جا سکے۔

6۔ ہمارا ادارتی ریکارڈ ہماری نیت کا بہترین ثبوت ہے۔
جیو نیوز گزشتہ کئی دہائیوں سے اسلامی فکر، دینی شعور اور مذہبی اقدار کے فروغ میں اپنا کردار ادا کرتا رہا ہے۔ ہم نے دینی صفحات، عالم آن لائن، رمضان ٹرانسمیشنز، حج، ربیع الاول، محرم اور دیگر اہم اسلامی مواقع پر خصوصی نشریات کا آغاز کیا اور اس روایت کو فروغ دینے والے اداروں میں ہمیشہ پیش پیش رہے ہیں۔

7۔ ہمارے مجموعی کردار کو بھی پیشِ نظر رکھا جانا چاہیے۔
ایک افسوسناک غلطی ہماری دہائیوں پر محیط ان مخلصانہ کاوشوں کو نظرانداز نہیں کر سکتی جو ہم نے عوام کی دینی رہنمائی اور اسلامی اقدار کے فروغ کے لیے انجام دی ہیں۔

8۔ انسانی غلطی کسی صورت جواز نہیں لیکن ایک حقیقت ضرور ہے۔
چوبیس گھنٹے چلنے والے ایک نیوز ادارے میں روزانہ ہزاروں ادارتی فیصلے کیے جاتے ہیں۔ ایسے ماحول میں انسانی غلطی کا امکان موجود رہتا ہے، مگر یہ کسی غلطی کا جواز نہیں بن سکتا۔ اصل معیار یہ ہے کہ ادارہ غلطی ہونے کے بعد کس طرح ردِعمل دیتا ہے۔ ہماری ذمہ داری ہے کہ غلطی کا فوری اعتراف کریں، اسے درست کریں، ذمہ دار افراد کا احتساب کریں اور اپنے نظام کو مزید مضبوط بنائیں تاکہ وہ غلطی دوبارہ نہ ہو۔

9۔ ہماری ادارہ جاتی روایت احتساب پر مبنی ہے۔
جب بھی ہم کسی غلطی کی نشاندہی کرتے ہیں، تو نہ ہم اس کا انکار کرتے ہیں اور نہ ہی ذمہ داری کسی اور پر ڈالنے کی کوشش کرتے ہیں۔ ہم کھلے دل سے اس کا اعتراف کرتے ہیں، مکمل اور غیر جانبدارانہ تحقیقات کرتے ہیں، جہاں مناسب ہو وہاں ذمہ دار افراد کا احتساب کرتے ہیں اور اپنے اداراتی نظام کو مسلسل بہتر بناتے رہتے ہیں۔

10۔ شفافیت عوامی اعتماد کو مضبوط بناتی ہے۔
ہم سمجھتے ہیں کہ ذمہ دار ادارے ایسی روایات کو فروغ دیتے ہیں جس میں غلطیوں کا دیانت داری سے اعتراف کیا جائے، منصفانہ انداز میں احتساب کیا جائے اور خامیوں کو چھپانے یا نظر انداز کرنے کے بجائے نظام کو مسلسل بہتر بنایا جائے۔

11۔ زیادہ رسائی کے ساتھ زیادہ جانچ بھی آتی ہے۔
دنیا کے سب سے زیادہ دیکھے جانے والے اردو نیوز چینل کی حیثیت سے ہماری پروگرامنگ کے ہر پہلو کا باریک بینی سے جائزہ لیا جاتا ہے۔ معمولی غلطیاں بھی وسیع پیمانے پر توجہ حاصل کرتی ہیں۔ ہم اس ذمہ داری کو قبول کرتے ہیں کیونکہ عوامی اعتماد ہمیشہ شفافیت اور جوابدہی کے ذریعے ہی حاصل کیا جا سکتا ہے۔

12۔ مسلسل بہتری ہمارا عزم ہے۔
اس واقعے نے ہمارے اس عزم کو مزید مضبوط کیا ہے کہ ہم ادارتی نگرانی، عملے کی تربیت، داخلی ضابطۂ کار کی پابندی اور معیار کی نگرانی کے نظام کو مزید مؤثر بنائیں تاکہ ہمارے صحافتی معیار مسلسل بہتر ہوتے رہیں۔

13۔ ہمارا کوئی ایسا ایجنڈا نہیں جو اسلامی اقدار کے خلاف ہو۔
جیو نیوز نے ہمیشہ امتِ مسلمہ کے مذہبی عقائد، اسلامی اقدار اور دینی جذبات کا احترام کیا ہے۔

جیو نیوز کی غیرمشروط معافی
جیو نیوز 10 محرم کو نشر ہونے والے مواد "سفرِ عشق” کے دوران ہونے والی غلطی کو تسلیم کرتے ہوئے معذرت کرتا ہے۔ اس مواد میں عراق اور کچھ دیگر مشرقِ وسطیٰ کے ممالک میں محدود تعداد میں افراد کی جانب سے اختیار کی جانے والی بعض رسومات کی عکاسی کی گئی تھی۔ یہ مواد محض ان مقامی رسومات کی عکاسی کرتی تھی اور اس کا مقصد کسی وسیع تر مذہبی نقطۂ نظر کی نمائندگی کرنا، اس کی تائید کرنا یا اسے فروغ دینا نہیں تھا۔

یہ مواد نہ تو جیو نیوز نے تیار کیا تھا اور نہ ہی اس کی اشاعت کسی ارادے یا مقصد کے تحت کی گئی تھی۔

ہم وضاحت کرنا چاہتے ہیں کہ جیو نیوز مسلم امہ کے وسیع پیمانے پر تسلیم شدہ عقائد اور حساسیت کے احترام کی اپنی پالیسی پر سختی سے کاربند ہے۔ ایسے مواد کی شمولیت ہمارے ادارجاتی مؤقف یا اداے کے نظریے کی عکاسی نہیں کرتا ۔

متعلقہ مواد کو فوری طور پر ہٹا دیا گیا، اور ادارے نے فوری طور پر اس میں ملوث افراد کے خلاف کارروائی کی۔ عوامی ردِعمل سے پہلے وضاحتیں اور معذرت نشر کی گئی تھیں۔

ہم کسی بھی تکلیف پر افسوس کا اظہار کرتے ہیں اور مذہبی احترام کے اعلیٰ ترین معیارات کو برقرار رکھنے کے اپنے عزم کا اعادہ کرتے ہیں۔

پیمرا کا نوٹس
پاکستان الیکٹرونک میڈیا ریگولیٹری اتھارٹی (پیمرا) نے جیو نیوز کو نوٹس جاری کرتے ہوئے 15 روز کیلئے نشریات معطل کرنے کے احکامات دیے ہیں۔

پیمرا نے حکم دیا کہ جیو نیوز کی نشریات سیٹلائٹ اور تمام نشریاتی نیٹ ورکس پر معطل رہیں گی، اس معاملے پر پیمرا کی شکایات کونسل بھی مزید کارروائی کے لیے سماعت کرے گی اور مزید ریگولیٹری ایکشن کی سفارشات مرتب کرے گی۔