برکیلئےپاکستان آنےوالی امریکی خاتون دربدر

ویب ڈیسک ۔۔ ایک امریکی خاتون، اونیا اینڈریو رابنسن، جو نیویارک، امریکا سے تعلق رکھتی ہیں، پاکستانی نوجوان احمد میمن کی محبت میں گرفتار ہو کر کراچی پہنچیں۔ تاہم، جب احمد کے والدین کو ان کے تعلق کے بارے میں معلوم ہوا، تو انہوں نے اس رشتے کی مخالفت کی اور خاتون کو دھوکہ دے کر غائب ہو گئے۔ اس واقعے کے بعد اونیا کراچی ائیرپورٹ پر پھنس گئیں اور اب وہ امریکا واپس جانے سے انکار کر رہی ہیں۔

اونیا نے 11 اکتوبر 2024 کو کراچی پہنچ کر احمد میمن سے ملاقات کی، لیکن جلد ہی ان کا ویزہ ختم ہو گیا، جس کی وجہ سے وہ ائیرپورٹ پر پھنس گئیں۔ احمد کے والدین نے اونیا کی عمر اور ان کی ماضی کی ازدواجی زندگی کے بارے میں معلومات حاصل کرنے کے بعد، اس رشتے کو مسترد کر دیا۔ والدین کی ناراضی کے بعد، احمد نے اونیا کو دھوکہ دے کر چھوڑ دیا، جس کے نتیجے میں وہ ائیرپورٹ پر بے یار و مددگار رہ گئیں۔

پاکستانی حکام نے اونیا کو امریکا واپس بھیجنے کے لیے ایک ٹکٹ کا انتظام کیا، لیکن انہوں نے واپس جانے سے صاف انکار کر دیا۔ امریکی قونصل خانے کی جانب سے بھی انہیں واپس لے جانے کی کوششیں جاری ہیں، لیکن اونیا احمد سے ملنے پر اصرار کر رہی ہیں۔

امریکی قونصل خانے کے نمائندوں کا کہنا ہے کہ اگر اونیا واپس جانے پر راضی نہیں ہوتی ہیں، تو انہیں زبردستی بھیجنا غیر قانونی ہوگا، اور اس سے امریکا اور قونصل خانے کے خلاف قانونی کارروائی کا خطرہ ہے۔

اس صورتحال میں مزید پیچیدگی اس وقت پیدا ہوئی جب اونیا نے پاکستان کی شہریت حاصل کرنے کی خواہش کا اظہار کیا اورکہاوہ نہیں جانتیں کہ وہ امریکی ہیں بھی یانہیں؟ وہ احمد سے ملنے کی امید لگائے بیٹھی ہیں اور اپنے ڈالرز واپس دلانے کی درخواست بھی کر چکی ہیں۔

فی الحال، کراچی ائیرپورٹ پر موجود امریکی قونصل خانے کی ٹیم اونیا سے مسلسل رابطے میں ہے، تاکہ انہیں راضی کر کے واپس امریکا بھیجا جا سکے۔ تاہم، اونیا کی ضد نے اس معاملے کو مزید الجھا دیا ہے، اور اب تک اس کا کوئی حل سامنے نہیں آیا ہے۔ آج نیوزکی خبرکےمطابق خاتون احمدکےگھربھی پہنچ چکی ہیں۔