غیرقانونی حج کی کوشش پرکڑی سزائیں

ویب ڈیسک: سعودی وزارت داخلہ نے اعلان کیا ہے کہ بغیر اجازت نامے کےمکہ اور مقدس مقامات میں داخلے یا قیام سے روکنے کے لیے کارروائیاں جاری ہیں۔ سعودی حکام نےخبردار کیا ہے کہ خلاف ورزی کرنے والوں اور غیر قانونی حج میں سہولت فراہم کرنے والوں کو گرفتار کر کے سخت سزائیں دی جائیں گی۔

سعودی پریس ایجنسی کے مطابق، مکہ کے الہجرہ ضلع میں حج سیکیورٹی فورسز نے حال ہی میں مختلف اقسام کے وزٹ ویزا رکھنے والے 42 غیر ملکی افراد کو حج قوانین کی خلاف ورزی پر گرفتار کیا ہے۔

ان خلاف ورزی کرنے والوں کے خلاف قانونی کارروائی شروع کر دی گئی ہے اور حکام ان افراد کو بھی گرفتار کرنے کے لیے کوشاں ہیں جنہوں نے انہیں پناہ دی۔

ایک علیحدہ واقعے میں، حج سیکیورٹی فورسز نےگھانا کے باشندے کو گرفتار کرلیا جو چار غیر ملکی خواتین کو غیر قانونی طور پر مکہ لے جانے کی کوشش کر رہا تھا۔

یہ شخص ایک بس چلا رہا تھا اور اس نے خواتین کو سامان کے خانے میں چھپا کر مکہ میں بغیر اجازت داخل کرنے کی کوشش کی۔ ڈرائیور اور خواتین کو گرفتار کر کے قانونی کارروائی کے لیے متعلقہ کمیٹی کے حوالے کر دیا گیا ہے۔

وزارت نے اعلان کیا ہے کہ وزٹ ویزا رکھنے والوں کو مکہ اور مقدس مقامات تک لے جانے یا لے جانے کی کوشش کرنے والے افراد پر 1 لاکھ سعودی ریال (تقریباً 26,600 امریکی ڈالر) تک جرمانہ عائد کیا جائے گا۔

یہی سزا ان افراد پر بھی لاگو ہوگی جو وزٹ ویزا رکھنے والوں کو کسی بھی قسم کی رہائش — جیسے ہوٹل، اپارٹمنٹس، نجی گھر، رہائشی مراکز یا حج ہاؤسنگ — میں مکہ اور مقدس مقامات کے اندر پناہ دیں یا قیام میں مدد فراہم کریں۔

بغیر اجازت حج ادا کرنے یا اس کی کوشش کرنے، یا بغیر اجازت مکہ اور مقدس مقامات میں داخل ہونے یا وہاں قیام کرنے پر 20 ہزار ریال تک جرمانہ ہو سکتا ہے۔

وزارت کا کہنا ہے کہ ایسے رہائشی یا غیر قانونی حاجی گرفتار ہونے کی صورت میں ملک بدر کیے جائیں گے اوران افرادکےاگلے10 سال کے لیے سعودی عرب میں داخلے پر پابندی ہوگی۔