آو،ہم تیارہیں ۔۔ پاکستان نےواضح کردیا

ویب ڈیسک: مقبوضہ جموں و کشمیر کے علاقے پہلگام میں سیاحوں پر حملے کے بعد بھارتی میڈیا نے ایک بار پھر بغیر کسی تحقیق کے پاکستان پر الزامات کی توپیں چلا دیں۔ انڈین سلامتی امور کے ماہرین اور ٹی وی چینلز نے حملے کے فوری بعد پاکستان کو موردِ الزام ٹھہرانا شروع کر دیا، مگر پاکستان نے ان الزامات کو مسترد کرتے ہوئے حقائق اور ماضی کے تجربات کی روشنی میں بھارت کو آئینہ دکھا دیا۔

بھارتی میڈیا کا فالس فلیگ بیانیہ، پاکستانی ماہرین کی کڑی تنقید

پاکستان کے سابق سیکریٹری خارجہ جلیل عباس جیلانی نے ایک نجی ٹی وی چینل سے گفتگو میں انڈین میڈیا کے دعوؤں کو "من گھڑت، جھوٹا اور بے بنیاد پروپیگنڈا” قرار دیا۔ ان کا کہنا تھا کہ بھارت کا فالس فلیگ آپریشنز کا ریکارڈ اب راز نہیں رہا، اور ہر حملے کے بعد پاکستان پر الزام لگانا اس کی عادت بن چکی ہے۔

انہوں نے خبردار کیا کہ ایسی کارروائیوں میں بھارت کی اپنی خفیہ ایجنسیاں بھی ملوث ہو سکتی ہیں، اور یہ صرف پاکستان ہی نہیں بلکہ امریکہ اور کینیڈا جیسے ممالک بھی بھارت کی ریاستی دہشت گردی کے الزامات کی گواہی دے چکے ہیں۔

”پاکستان مکمل تیار ہے“: سفارتی اور سیاسی ردعمل

بھارت میں پاکستان کے سابق ہائی کمشنر عبدالباسط نے ایکس (سابق ٹوئٹر) پر لکھا:

"مجھے یقین ہے کہ بھارت کی کسی بھی جارحیت کا جواب دینے کے لیے پاکستان پوری طرح تیار ہے۔ اس بار جواب فیصلہ کن اور منہ توڑ ہو گا۔”

پاکستان پیپلز پارٹی کی سینیئر رہنما سینیٹر شیری رحمان نے حملے کی مذمت کرتے ہوئے کہا کہ بھارت کا ہر واقعے کے بعد پاکستان کو الزام دینا ایک سیاسی ہتھکنڈہ ہے تاکہ اپنی اندرونی ناکامیوں سے توجہ ہٹائی جا سکے۔

انہوں نے خبردار کیا کہ بھارتی دائیں بازو کی انتہا پسند قوتیں ایک بار پھر بغیر ثبوت کے جنگی نعرے لگائیں گی، اور خطے میں کشیدگی بڑھانے کی کوشش کریں گی۔

سوئفٹ ریٹارٹ کی یاد دہانی، میڈیا اور عوام کا مؤقف دوٹوک

پاکستانی میڈیا اور سوشل میڈیا پر عوام نے بھی بھارتی الزامات کو سختی سے رد کرتے ہوئے 2019 کی "سوئفٹ ریٹارٹ” کی یاد تازہ کی۔ معروف اینکر غریدہ فاروقی نے اپنے بیان میں کہا:

"ہم سوئفٹ ریٹارٹ کے ساتھ تیار ہیں، اور اس بار پہلا وار ہی آخری ثابت ہو گا، انشااللہ۔”

یہ پیغام کئی دیگر صحافیوں، تجزیہ کاروں اور عوامی حلقوں میں بھی گونجتا رہا، جو بھارت کو یہ باور کروا رہے ہیں کہ پاکستان اب کسی اشتعال انگیزی کو نظر انداز نہیں کرے گا۔

عالمی برادری کی خاموشی اور پاکستان کا مطالبہ

پاکستانی ماہرین اور تجزیہ نگاروں نے عالمی برادری سے مطالبہ کیا ہے کہ وہ بھارت کی جانب سے بار بار پاکستان پر بے بنیاد الزامات لگانے کی روش کا نوٹس لے۔ ان کا کہنا ہے کہ خطے میں امن تبھی ممکن ہے جب جھوٹے بیانیوں کی بجائے غیر جانبدار، آزاد اور شواہد پر مبنی تحقیقات کی جائیں۔

پاکستان کا مؤقف واضح ہے:

"الزام تراشی نہیں، تحقیق اور سچ کی بات کریں۔ اور یاد رکھیں، پاکستان دفاع کے لیے ہر دم تیار ہے۔”