ڈیل کروورنہ بمباری کیلئےتیارہوجاو،ٹرمپ کی ایران کودھمکی

ویب ڈیسک: سابق امریکی صدر ڈونلڈ ٹرمپ نے خبردار کیا ہے کہ اگر ایران نے جوہری معاہدے پر اتفاق نہ کیا تو اسے بمباری کا سامنا کرنا پڑے گا اور تہران پر ثانوی ٹیرف بھی عائد کیے جائیں گے۔

غیرملکی خبر رساں ادارے رائٹرز کے مطابق، ٹرمپ نے ایک امریکی ٹی وی چینل کو انٹرویو دیتے ہوئے کہا کہ امریکی اور ایرانی حکام کے درمیان مذاکرات ہوئے، مگر وہ کسی نتیجے تک نہیں پہنچ سکے۔

ان کا کہنا تھا، اگر ایران معاہدہ نہیں کرے گا تو پھر بمباری ہوگی، لیکن ابھی ایک موقع موجود ہے۔ اگر وہ تیار نہ ہوئے تو میں وہی سخت اقتصادی پابندیاں عائد کروں گا جو چار سال پہلے لگائی تھیں۔

پسِ منظر:

ڈونلڈ ٹرمپ نے اپنے دورِ صدارت (2017-2021) میں ایران کے ساتھ 2015 میں ہونے والے جوہری معاہدے سے علیحدگی اختیار کرلی تھی، جس کے بعد امریکا نے تہران پر سخت پابندیاں عائد کر دی تھیں۔ اس معاہدے کے تحت ایران نے اپنی جوہری سرگرمیوں کو محدود کیا تھا، جس کے بدلے میں اسے معاشی ریلیف ملا تھا۔ تاہم، معاہدے سے امریکا کی دستبرداری کے بعد ایران نے یورینیم افزودگی سمیت جوہری پروگرام میں طے شدہ حدود سے تجاوز کیا تھا۔

ایران کا سخت ردعمل

دوسری جانب، ایران نے ٹرمپ کی دھمکیوں پر شدید ردعمل دیتے ہوئے سخت مؤقف اختیار کیا ہے۔ تہران نے عمان کے ذریعے ٹرمپ کے ایک حالیہ خط کا جواب دیتے ہوئے واضح کیا ہے کہ ایران کا جوہری پروگرام مکمل طور پر شہریوں کی توانائی ضروریات کے لیے ہے اور کسی دباؤ کو قبول نہیں کیا جائے گا۔