فیض حمیدکےخلاف چارج شیٹ سامنےآگئی

جنرل (ر) فیض حمید کے خلاف چارج شیٹ اور کورٹ مارشل کی کارروائی شروع
ویب ڈیسک ۔۔ پاکستان کی فوج کے شعبہ تعلقات عامہ (آئی ایس پی آر) کے مطابق 12 اگست 2024 کو پاکستان آرمی ایکٹ کی متعلقہ دفعات کے تحت لیفٹیننٹ جنرل فیض حمید (ر) کے خلاف فیلڈ جنرل کورٹ مارشل کی کارروائی شروع کی گئی۔
فیلڈ جنرل کورٹ مارشل کے اگلے مرحلے میں انہیں باضابطہ طور پر چارج شیٹ کردیا گیا ہے۔

چارجز کی تفصیلات

ترجمان پاک فوج کے مطابق لیفٹیننٹ جنرل فیض حمید (ر) کے خلاف درج الزامات میں درج ذیل شامل ہیں:

• سیاسی سرگرمیوں میں ملوث ہونا
• آفیشل سکریٹ ایکٹ کی خلاف ورزیاں کرتے ہوئے ریاست کے مفاد کو نقصان پہنچانا
• سرکاری وسائل اور اختیارات کا غلط استعمال
• افراد کو ناجائز نقصان پہنچانا

پر تشدد واقعات اور بدامنی کی تحقیقات

فیلڈ جنرل کورٹ مارشل کے عمل کے دوران ملک میں انتشار اور بدامنی سے متعلق پرتشدد واقعات میں لیفٹیننٹ جنرل فیض حمید (ر) کے ملوث ہونے کی علیحدہ تفتیش بھی جاری ہے۔
ان تحقیقات میں 9 مئی سے جڑے پرتشدد واقعات بھی شامل ہیں۔

سیاسی عناصر کی ملی بھگت

آئی ایس پی آر کے مطابق ان پرتشدد واقعات میں سیاسی عناصر کی ایما اور ملی بھگت بھی شامل ہے۔
فیلڈ جنرل کورٹ مارشل کے دوران لیفٹیننٹ جنرل فیض حمید (ر) کو تمام قانونی حقوق فراہم کیے جا رہے ہیں۔

چارج شیٹ کے اثرات اور الزامات

ذرائع کے مطابق، لیفٹیننٹ جنرل (ر) فیض حمید کے خلاف چارج شیٹ کا مطلب ہے کہ ان کے خلاف مکمل ثبوت موجود ہیں۔
سب سے اہم الزام ان کی سیاسی سرگرمیوں میں ملوث ہونے کا ہے، جس میں انہوں نے 9 مئی اور دیگر احتجاجی واقعات میں کردار ادا کیا۔

عمران خان کی ہدایات پر اقدامات

پریس ریلیز سے یہ بھی ثابت ہوتا ہے کہ فیض حمید نے یہ تمام اقدامات عمران خان کی ہدایات پر کیے تھے، جو کہ ایک سیاسی جماعت کے سربراہ ہیں۔
ذرائع کے مطابق، حقیقی مجرم پی ٹی آئی کی سیاسی قیادت ہے، جس نے اس افسر کو اپنے ذاتی مفادات کے لیے استعمال کیا۔

مستقبل کے قانونی نتائج

چارج شیٹ کے بعد باضابطہ کورٹ مارشل کی کارروائی شروع ہو چکی ہے۔
اگر سزا ملتی ہے تو لیفٹیننٹ جنرل فیض حمید (ر) کی پنشن اور سروس ضبط ہو سکتی ہے، جبکہ سیکریٹ ایکٹ کی خلاف ورزی پر 14 سال تک سزا ہو سکتی ہے۔ اختیارات کے ناجائز استعمال پر جرمانہ اور دیگر سزائیں بھی ہو سکتی ہیں۔